Rechercher
  • famycomm

فوقاش خسك تنسحب؟

كل واحد منا فهاد الحياة كيعيش ظروف مختلفة، كنقدرو نعانيو من الغربة، من الفشل، من لفراق، من الموت، من جرح، من

خذلان ... بسبب التوقعات ديالنا.. وبعض المرات كتلقى شحال من واحد ووحدة كيديرو للي فجهدهم باش يغيرو النتيجة، كيتجنبوا كل ما أمكن النتيجة الخايبة.. حيت أهم حاجة عندهم هي تكون مرتاح وخا غير مؤقتا، أهم حاجة هي تكون هارب وانت عارف راسك غير كتأجل النتيجة... وبزاف دالمرات كنلقاو ناس كيتقاتلو بيديهم ورجليهم باش يبقاو مستمرين فعلاقة، او ينجحوا فمشروع.. وخا هو كيشوف الفشل واضح وقدام عينيه لكن ما كتسرطليهش يخسر...


بزاف ديال لبلوكاج والمشاكل فحياتنا كتكون بسبب اننا كنقاومو فلبلاصة الغلط، كنحاربوا من أجل ناس ما تستاهلش.. وهادشي غير حيت كنفكرو كتر ما كنديرو، كنخليو المشاعر ديالنا والهضرة دالناس تمشينا على هواها، كنفضلو نبقاو نحاولو ونضورو فحلقة فارغة على أننا نبدلو الطريق والعتبة... كيجينا عيب وصعيب نقررو فعلاقاتنا الغالطة، لكن عادي نبقاو مستمرين فحياة عامرة كدوب وخوى.. هادشي كولو كنتعلموه من الصغور ديالنا، كنشوفو حياة الجماعة كيفاش كتمشى وكنديرو بحالهم.. ما كنعطيوش فرصة لعقلنا يخدم ويفكر بطريقة مختلفة، بطريقة كتليق بنا وبالاحلام ديالنا... ولفنا التوقعات ديالنا فالناس للي دايرين بنا كتكون كبيرة ما عندهاش الحد، والتوقعات فراسنا صغيرة ما عندهاش اهمية ولا تأثير..


فبعض المعارك فالحياة كيما بغات تكون.. خسنا نختارو ننساحبو، نهربو، وننقدو داكشي للي بقا منا، داك الجانب للي باغي يعيش احسن... الانسحاب ما كيعنيش الفشل لكن هو فحد داتو نجاح، راه غير أنك تفكر تخلي شي حاجة غلط هو انتصار على نفسك.. وانتصار على الخوف ديالك من البداية من الصفر فكلشي...


انسحب الى كنت مع شخص ما كيحترمكش، انسحب الى كنت مع ناس كيضعفوك، انسحب الى كنت فبلاصة ما كاتليقش بك، انسحب الى كان الحلم ديالك دام كتر من عمرك، انسحب الى كان المشروع للي خدام عليه استنزفك وخدا كتر من وقتو، انسحب فاش تلقى راسك عييتي وحتى حاجة ما بغات تتبدل... الانسحاب بعض المرات كينقدك من الموت، كيهديلك حياة جديدة كتستاهلها.

يسمينة الفارسي bloger


#top_conseil #advices #entrepreneuriat #management #gestion #business #مقاولة #المغرب

213 vues0 commentaire