الشوفة ديالك لراسك فلمرايا كتعبر عليك، الى كنت كاتشوف العيوب كتر من الحسنات وما كاتطولش الشوفة لراسك عرف انك مدابز معاك، ما كاتعرف والو عليك وغادي بالمقلوب... ياللاه الى شفتي فراسك كاديري لعكر او كاتصايب شعرك باش تعجب الناس للي غادي تقابلهم.. الشوفة ما كاتتجاوزش اللباس والمضهر الخارجي...
باش تكون، خسك اول حاجة تحس وتعيش على اساس انك كاين، واعي بأحسن اللحظات فحياتك وأتعسها، مشغول ديما بالحاضر، كدير مجهودك باش تعيش اكبر وقت فايق وعايق بداكشي للي كيوقع فحياتك سواء صغير او كبير.. كتستمتع بداك التفاصيل الصغيرة للي ما كايشوفوهاش الناس كاملين وخا والديك...
باش تفكر فشنو غادي تكون كيخسك تجلس وتتحاسب مع راسك، تجيب الورقة وستيلو .. وتحاول انك تعرف الصغيرة ولكبيرة فيك، تفهم وتآمن بللي العيوب للي كاتشوفهوم ضعف هما الحاجات للي كيميزوك على هاد العالم.. كيخسك غير تبدل النظرة ديالك ليهم وباركا ما تبقى تخبيهم، عيشهوم وغاتلقاهم فصفك ديما وعمرهوم يحشمو بيك.. ماشي عيب تكون عندك اعاقة، ماشي عيب تكون كتلعثم، ماشي عيب تكون ما كاتشوفش او ما كاتسمعش مزيان... هادشي كووولو ماشي عيب وماشي نقص، هادشي انت.. وبطريقة او بأخرى الى شفتيهم بشوفة مختالفة غادي تلقاهم جزء منك وما يمكنش تكون بلا بيهم.. انت هاكا مثالي ...
قبل ما تفكر شنو باغي تكون فالمستقبل جيب الخشيبات وجلس حط ݣاع الصفات المزيانة والصفات الخايبة للي باغي تبدلها فيك، تكون صريح مع راسك وجريئ.. حيت هاد النقاش ماشي مع شي حد باغي تبان عليه، هذا نقاش يقدر يغيرك جدريا ويبدليك مستقبلك...كولشي كيبدا من اللحظة للي كاتشوف فيها راسك فلمراية وما كاتملش.. ما كتشفقش على راسك، عارف شكون انت بكل حاجة قوية او ضعيفة فيك...
هاكا الحياة كتمشى، ما تقدرش تعيش حر وتستمتع بالحرية الحقيقية وانت لداخل ديالك مسجون، عايش على الخوف... حشمان من الماضي ديالك او ما راضيش على الواقع ديالك، مزال حاسب راسك مسؤل من الوالد ديالك.. والسمعة ديالك من السمعة دعائلتك.. ما حدك كتفكر انك فاشل او فقير او شمكار او بلا قيمة غير حيت خلقتي فعائلة فاشلة او فقيرة او جاهلة او متدينة او فاسدة فماغادي توصل فين وراك غالط مليون فالمائة..فعلا كانكونو فواحد المرحلة من حياتنا مرتابطين بزز منا بعائلاتنا وبأي حاجة كتتعلق بيهم وبزز منا خسنا نعيشو بلا ما نقررو شنو لاي يصلحلينا وشنو للي ما يصلاحش لينا... لكن فاش كنكبرو وكيوللي عندنا فرصة الاختيار كانولليو مسؤولين مباشرين على مصيرنا وحياتنا، ما كيهمش كيفاش كيشوفوك داركم، كيفاش كاتبان لهائلتك مكلخ وما فيدك والو، أهم حاجة هي انك ما خسكش تأكد الرأي ديالهم فيك وتكون كيفما باغيينك هما تكون او كيما كايشوفوك وخا انت ماشي هاكاك، انت مختلف ولداخل ديالك بزاف ديال الضو محتاج يخرج، بزاف ديال الطموح.. تبدلتي بزاف.. وليتي محتاج الاحترام من والديك، التيقار من جاركم الباسل، كبرتي وما بقيتيش صغير...
فاش كاتشوف راسك واضح مالداخل، كاتعرف مزيان شنو غاتكون، غاتعرف شحال تقدر تبدل وتغير ويكون عندك بلاصة فهاد العالم فيها سميتك ... ماشي غير اسم خلق وغايموت ... اما الى عشتي كاتقاتل غير باش تثبت للناس شي حاجة ما كايناش فماغادي تكون والو.
BLOGER YASSMINA EL FARISSI